خلّاف وعود
صياد قلوب وقلبه صادني
والعشق مني اتمكن
لو احن لِيه الاقيه يلاوعني
ويقوللي يا بني يحنن
ولا عمر قلبه رق وطاوعني
وتملي فيا يعكنن
وانده عليه ولا يوم سِمِعني
ولا حتى كلمة تطمن
دانا قلبي شاري
طب ليه يبيعني
يوعد وقلبه يصهيّن
لو قال معادنا ع العصر يعني
بكون هناك
قبل الادان مايأدن
واستنى طيفه ع الروح يعدي
وكأني ليه بتوسِّل
واقلق عليه ويسيبني وعيي
وظنوني فيا تنسّل
واسال عليه ماجيتشي ليه
يقوالي كنت مكسِّل
زود كلام عزالي عني
ف هواه ظلمني
والكل بقى بيلسِّن
كترت ألامي واتمكنت
جراحي مني
ولا يوم كمان بتحسِّن
وبقوله حنّ
م الشوق بأنّ
الاقيه يضِنّ
ولا جرحي مره يسكِّن
ايام تمر وسنين تفوت
والعمر مر وهم ووعود
هوه عشان ما بحبه موت
لازم يشوفني بعنيه بموت
ويحن لما ابقى ف تابوت
ويجيني وانا متكفن
وف يوم مماتي يتمنى اعود
خلّاف وعود
بقلمي، / خالد جمال ١٨/١/٢٠٢٤
ليست هناك تعليقات:
إرسال تعليق