زجلية تحت عنوان : سوقك خاوي***

 زجلية تحت عنوان :

سوقك خاوي***

سوقك خاوي

سلعتو قوالب وتلاوي

ما فيه غلة لاوي

ها البخة ها الجاوي

والشاري في عينو جلالة ما داري

سوقك خاوي

ها البوق ها الشناق ها الداوي

ها اللحاس ها الجامع والطاوي

في دروبو تالف لمخلوق جايع عاري

لهلال ظلم ما عاد ضاوي

ضياق لحال فيه والذيب العاوي

راه صبح في الخرفان ...

بايع وشاري

سوقك خاوي

لا خدمة لاصحة لا من يداوي

لا تعليم لا شبعة غ دوران ولقهاوي

ذيل لخيبة كادي حطبها ...

فكيف ب لهايتك تطفي ناري

عقلية منخورة عاد فيها لجاهل راوي

قلوب طايشة ولفت مْخيض شكاوي

عاد الود شوكة ولخير تناوي

ؤ ل تقول عليه شريف ظريف...

تلقاه لحنكو كاري

سوقك خاوي

ها لمشنق ها لمدرح ؤ لبلاوي

لا صفا لا وفا لقسوة ولكاوي

ضاع الحق بين الزحمة ...

وفقس لباطل ؤ لفضايح وادها جاري

سوقك خاوي

عامر فساد لفتنة والخاوي

معاك ما يطلع صبح ...

ؤ ما يفرحو طيور شجاري

سوقك خاوي

فشوف ليك سلعة الصفا ولحلال

لمعقول ؤ حلل رزقك والمال

دير لمزاد في لخير...

ؤكون لبراح وراوي

بل لبضاعة لكذوب والنفاق رميها

تروج السوق وينتعشوا من الفاقة ماليها

تزهر لقلوب إخلاص وجدية...

الفضيلة بذرة والحشمة فراشة على نواري

سوقك خاوي

*** الشاعر والزجال: احمد الكندودي ***المغرب ***

كل التفاعلات:

١١