حلم الفقير بقلم احمد محمود من ديوان حبة رتوش

 حلم الفقير

ثروتك ايه. ياعم الفقير

معزه قايمه ونعجه نايمه

وفرختين وجوز حمير

اوصف لي نومك

ياعم الفقير

يوم عل السطوح

يوم في الطواله

وساعات بنام تحت السرير

اصل العيال عددهم كتير

اوصف لي زادك ياعم الفقير

يوم لقمة ناشفه

يوم لقمة حاشفه

وساعات كتير بنام خفيف

اوصف لي السعاده

ياعم الفقير

السعد وعد للموعودين

اصل السعاده لعند الفقير

تجري منه ولفوق تطير

اصله فقير

طلباتك ايه ياعم الفقر

فض مجالس ولا كلام امير

كلام امير

لا مش كتير

تعيشوني وتسعدوني

قد اللي عيشته وانا فقير

قصر ملوكي مفروش حرير

والأكل لحمه

وحمام محشي وكمان طيور

والزبده بلدي ويا الفطير

والمال ده رزم

فوق الدولاب وتحت السرير

وتجوزوني اربع حريم

وام العيال ياعم الفقير

طلاق تلاته

ما تنام معايا علي الحرير

طب والعيال

ها يونسوها ويحرسوها

انا اصلي حمش وكمان بغير

نهق الحمار وكمان رفسني

لقيت نفسي

في قلب الطواله ويا الحمير

انا كنت بحلم حلم جميل

ياميت ندامه

طار الحمام ويا الحريم ويا الفطير

حلم الفقير

بقلم

احمد محمود

من ديوان حبة رتوش

عرض الرؤى

معدل وصول المنشور: ٣٧

كل التفاعلات:

١ارق ملاك