متتعشم.. بالدنيا.. كتير **********

 متتعشم.. بالدنيا.. كتير

**********

همنا أكل فتة ولحمة

البال بالهموم زحمة

بص للقلب جوانا

تلاقيه مفهوش رحمة

الطير هجر ع الشجر

من غدر وطبع البشر

خلاص نسينا آخرتنا

مش حاسين بالخطر

القلوب مش لله لاجئة

الجباه مش لله سجدة

العمر بيجرى بينا

الموت بيزونا فجأة

وخدانا يادنيا لفين

بنبصلك بس بالعين

بتشترى وتبيعى فينا

عشان كدا القلب حزين

دبل قبل آوانه الورد

محدش بيدور على حد

أيه اللى جرى لينا

الدمع جرح الخد

يعوض الله ع الأمان

خلاص جيه الطوفان

دور بس حوالينا

متلاقيش بالقلب إيمان

البشر فاكر نفسه مظلوم

ربنا سخر له كل مافى الكون

واحنا اللى بأيدينا

بنزرع ونحصد الهموم

الكون بينا ضاق

الغل بالقلب داء

بصوا شوفوا حالنا

ع الورث قتل وخناق

تاه الحلال ف الحرام

النور بقا ظلام

مات بالصدر الآمال

غاب تحت سمانا السلام

دم البشر ع الأرض سال

شاب بدرى الغلام

حالنا ع الدنيا بقتال

راح فين الأمان

الإنسان مبقاش إنسان

حاله بقا جبان

همه السلطة والمال

الإنسان ع الدنيا طماع

وشه بألف قناع

م الأخر العيب فينا

البشر للآخرة باع

الحنان م القلب ضاع

بين الصدر كله فراغ

عايش الدنيا بصراع

نايم صاحى بصداع

البشر عن الحق تاه

ضاقت بيه الحياه

عشان بعد عن الله

دا الموت مبيفرقش

بين صغير وكبير

سليم ولا عليل

متتعشم بالدنيا كتير

********

بقلم

عادل جاد

كل التفاعلات:

٤عادل جاد و٣ أشخاص آخرين