زجلية تحت عنوان : مدابز مع راسو ***

 زجلية تحت عنوان :

مدابز مع راسو ***

مدابز مع راسو

مريض بنقصو

ؤكمل عليه وسواسو

عامر تحراميات وخواض

ابو كلخة ل جهلو فاض

طلى معاه هلو وناسو

ما عرف قياسو

فات الحد وفرعن

ما حشم وخا لسانو مصنن

مزوق من برا...

خانزة دواخلو رايب ساسو

مدابز مع راسو

عامر فز وظنون

منوي عيان ضبعون

هذا شتمو ولاخر داسو

حيت جمع السلطة والمال

ما هزتو لأرض ما ترزن ؤتقال

مخلوق مصندل ...

واخا لغاه وزواقو ولباسو

جرتيلة ما يسوى وقية

السفاهة والمثلية والدونية

طاح عليه لحيط...

ؤ عاد مدابز غ مع راسو

بل جمع مراكب شرورو وقلع

طرزان زعما وببلانتو يخلع

ساعة ما لقى ما يشلو وهرس ضراسو

كثرة البغض والتكنزيز

شماتة سوقي تربية التحنزيز

ركب على لملاطي ؤجا على راسو

ؤحيت العقد الصغر والطفولة

لاعبة فيه ؤ عادت نفسو معلولة

تفجر فيه بركان الحقد والضر...

طار لو لفريخ وتحرم من نعاسو

ؤ عاد مدابز غ مع راسو

*** الشاعر والزجال: احمد الكندودي *** المغرب ***

كل التفاعلات:

٢٢