زجلية تحت عنوان: الدايخ والدايخة***

 زجلية تحت عنوان:

الدايخ والدايخة***

يا ذاك الدايخ...

ويا ذيك الدايخة

ويا ذاك النايح...

ويا ذيك النايحة

واش كاع ما عيتو

ما فقتو ما وعيتو

كارمين من الحس...

بحال قديدة المالحة

ليدين يخبطوكم من هنا ومن لهيه

تحكموا فيكم بالميديا وداكم التيه

ها مسلسلات والأجندات الطايحة

بل عدتم لعبة قتلوا فيكم الطيبة

لقحوكم شر الطبع لا خلق لا هيبة

ردوكم مناطح مناطحين ...

ولمحاكم ساحة

لمراة والرجل بالحب والصفا يتلقاو

الالتزام والرجولة ماشي يتلهاو

طنز علي نطنز عليك والعلة سايحة

فيا ذاك الطالح ...

ويا ذيك الطالحة

غسلوا ذاك الدماغ من الفتنة والشك والريبة

صفيو تشربو يكون ليك حبيب وليه حبيبة

ما يحكم في دينكم ما يبدلو حد...

وما يترماو عليكم ولاد الدونية والجايحة

ذوك لي ركبوا الفتنة ولخصام

غرروا بنا ؤ ووراونا من الحرية اطنان

عبيد الشيطان...

ماسونيين لا دين لا أخلاق صالحة

بل زراع الطايحة

فنوض الرجل وشد لخط وصفي القول

خوي راسك راه عامر نزوة وبقول

كون مسؤول ؤ وردة بالمعقول فايحة

لا تضحك على هاذي وهاذي

امك وختك تم فافهم مرادي

تعواج السفينة ؤ تريب الحشمة والسماحة

الى عطيتي لعهد وفى بيه

لي زرعتيه راك غدا تحصديه

كون سبع مول الراي ...

الحب والصدق والنقاء والصراحة

ؤ نتي يا زينة لبنات

خطيني من التزيار وزواق والتشتات

فما يرحموك جواني لبهوت والسلاخة

ذيك الانوثة والعزة صونيها

لا تعرضيها في زناقي والجثة غطيها

ؤ ل بغيتيبي صالح. الصالح...

كوني بعدا نتي صالحة

ما يسكن وهم بالك ما يهمك بو مال

الزواق يطير والغنى ف راحة البال

عطي الشان لنفسك ولا تكوني سلعة مباحة

نقضيو على دعاة الشتات وهدم لبيوت

نخليو ذاك الفوت فيهم يفوت

هدم الاسرة ولمحبة ذباحة

لحق حق فمسحو لمروار و لحشمة أساس

ردوا لمحبة جنينة تحيي الانفاس

تصدح اقلام الهيام افراح وراحة

من دعاة التفسخ والشناقة كون مجبد

تبع شرع الله وعن اوامرو لا تبعد

يعود صالح السبع الصالح...

وتعودي نتي اللبؤة صالحة الصالحة

بالخير والحب سكتو لفام

صحاب لقلوب المنخورة العامرة جذام

تعود لمحبة الرحمة ولحنان

يصلاح حال لبلاد ويهز الله...

غضبو والجايحة

بل يجتمع شمل البيت

وتعود ازهارو بالامل فايحة

*** الشاعر والزجال: أحمد الكندودي ***المغرب ***

كل التفاعلات:

١١