ملايكه تحت القصف
مين اللي يرضى حرق البراءة
قتل الوليد في المهد
ولا شايفه عينها للفرح طاقه
م الخوف ملاها السهد
مُر وألم مالهاش بيه طاقه
وجراح تفوق الحد
الحزن ليها بقى زي عاده
ودموعها سيل ع الخد
يا دنيا فين راحت الشهامه
ليه فيكي ضاع الحق
النخوه فين وفين الكرامه
وغيرتنا فين ع العرض
وين العرب ويا ميت ندامه
على خلق خانوا العهد
شايفين بعينا ثكلى ويتامى
واقفين نبص لبعض
داحنا استحاله نملك أراده
طول ماحنا فينا الضعف
ده العمر مره مالهوش اعاده
ليه نعيشه ذل وقهر
ده عدو باغي ومالوش هواده
خاين ف دمه الغدر
ده في الاباده عدى وتمادى
سفاح ومجرم حرب
وبتقوى شوكته ليه كل مادى
علشان مسانده الغرب
ده مهما يعلى تحت البياده
مغلوب شتيت الصف
لو مهما زادوا لينا السياده
علشان صُحاب الارض
داحنا بايمانا ويا الاراده
لو ميه نغلب الف
عايزين لروحنا هيه انتفاضه
مش حزب واهي وحلف
ما خلاص زهقنا شعارات يا ساده
وضربنا كف بكف
ملايكه تحت القصف
بقلمي/ خالد جمال ٢٤/١٠/٢٠٢٣
ليست هناك تعليقات:
إرسال تعليق