***موال الصبر ***

 ***موال الصبر ***

للشاعر /صابر الشناوي

لملمت آهات الصبر

ضميتها في سكوتي

وكل آه فيا

بتعلن ميعاد موتي

بقولها وأداريها

بضحكه من صوتي

حتى ليالي السهر

حطتني في تابوتي

نجومها وي القمر

مخنوقه بسكوتي

منا كان واخدني الأمل

والحلم كان طارح

ووعدني أنسى الألم

أو أي شيء جارح

رميت شباك الشوق

جوايا على الآخر

م العشق قلت أدوق

والشوق ملوش آخر

طرحت شباكي الصبر

والصبر طعمه مر

شربت كاس ورا كاس

وأيام تقيله بتمر

بتفتت الإحساس

والقلب بقى مش حر

حتى كلام الشوق

غلب كمان مني

سكران ونفسي أفوق

والنوم طاير مني

وف صدري كلام مخنوق

ومل السكات مني

لملمت أحزاني

ورميتها جوايا

ورسمت على وشي

كلام ملوش معنى

لو قلت مليون آه

طب مين هيسمعني

ومشيت مع الأمواج

تايهه وأنا محتار

لا بحري شايفه له شط

ولا أنا. بحار

عومي على قدي

ماشي مع التيار

بشرب في ميه بحر

تعطش ولا ترويش

عاشق عيونها السمر

وفي حبها درويش

أشرب كاسات الصبر

ولازم أتحمل

عشق العيون السمر

رجعني من الأول

ألملم آهات الصبر

وأطويها في سكوتي

لو قلت مليون آه

محدش سامع صوتي

عرض الرؤى

معدل وصول المنشور: ١٠

كل التفاعلات:

٢صابر الشناوي وارق ملاك