إنتهى الموضوع بقلم أحمد شاهين

 إنتهى الموضوع بقلم أحمد شاهين

مات الكلام من زمن

بس احنا بنِهاتى

صبح الكلام له تمن

والرك ع الحاتى

حبة كلام يسجنوك

ما تشوفش نور الشمس

بس انت عاوز تعيش

خالص تحياتى

مات الكلام الحقيقى

أقصد كلام الحق

دورت طولة طريقى

ما لقِيتش قولة لأ

الكل دايمآ موافق

وايدين بتِدى تكافئ

ضيعتوا كل المرافق

وصّرخنا جوه الشّق

مات الكلام وإندفّن

جوه جراب مقطوع

ولبسوه الكفّن

بس الدٌعا ممنوع

قطعوا لسان الحقيقه

والقسوه دايمآ بريئه

للظٌلم مليون طريقه

علشان نموت م الجوع

مات

الكلام

قولت

لك

وانتهى

الموضوع

كلمات أحمد شاهين

عرض الرؤى

معدل وصول المنشور: ٥

كل التفاعلات:

١Ahmed Mohamed Ahmed Shahen