زجلية تحت عنوان :تجار الأزمة *** زكَا... الشاعر والزجال: أحمد الكندودي ***المغرب ******

 زجلية تحت عنوان :

تجار الأزمة ***

زكَا...

يا تاجر الأزمة زكا

مخلوق ما فيك ريحت بنادم

منشار طالع نازل غانم

طماع شلاهبي ؤ حلف ما يرسا

زكا...

ذاك حق لي تحت الردمة

حرام تْسلى بأنين لمكلوم يا جذمة

تتاجر بقضيتو حيت قزم غمة

بل قل كلب لخلا سلاطة ...

والراس حجرة وكدية

سير سير بعد لهيه

ما بغينا منك عطية ؤخيرك شديه

شناق في الالم والدموع ...

ؤزادك ربي تلفة وزلكا

تْرَكا

شد لقُنت ؤعطي لولاد بلادي التيقار

شعبي قاد ؤ قدود فخوي يا السمسار

همك يعمر حافك ...

وعلى الريال مات حسك وعشتي لوعكة

زكا

ذاك من تضامن اولاد بلادي

ل بغيتي تربيهم فعاد العالم بهم ينادي

تلاح يا لعاصي ما عدت منا وبالمرة...

وقدام الدنيا عركتي عركا

رجال بلادي ف بحالك راهم يشطبوا

غ تسنى نوبتك دابا توصل ؤتحاسبو

كلاب الكرنة لا دين لا ملة

زكا

يا شفيفير ورسا

ب لحرام درتي كركور وزيدتي طحشة

خسر ليك الله الصورة واللون والمرسى

شماتة وفي لحم خوه لقى اللذة ...

وفي شكاه نغمة

حيت تخلق باش يفترس

شيطاني ما يحرث ما يغرس

صياد الأزمات ...

تابع ريحت الموت والردمة

زكا...

يا تاجر الألم والأزمة

الشاعر والزجال: أحمد الكندودي ***المغرب ******

كل التفاعلات:

٢٢