( باي باي )

  ( باي باي )

في العادي ..

كان ممكن أتألم سنين وشهور

واقفل باب أوضتي عليا

وأطفي النور

وأسح دموع محوشها ..

من عمر فات كُنت حايشها

ويجي الوقت وأنعشها ..

وأعيش الدور

كل دا كان لو فكرتي ، إنك تسيبيني

وأطير وأروح لطبيب نفسي ..

يمكن يداويني

ولا كان الطب ف ساعتها ..

يوصل لعلاج

وكنت أثور كطور هايج ..

ف توب الحجاج

واصدر فرمان فوري وعاجل ..

لكِ بالإعدام

وامنع مخلوق يخطي جنازتِك ..

لو حتى إمام

وافقئ عيني يجي مِيت مره ..

لو تلمح طيفك

واخنق النسمه لو جاتلي ..

تشهرلي سيفك

واحرق صورك إل راسمها وفيها إحساسي

وافصل قلبي عن قلبك ..

من حُضن كراسي

وأمحي أي قصيده كنت كاتبها ، وإسمك فيها

والغنوه المخصوصه عشانك ..

كمان هلغيها

كل دا كان لو فكرتي

وعلشان مش ثابته على مبدأ

ونظراً لإنك إتغيرتي

فبعلنها قدامك دلوقتي

ياللّا باي باي

ضيعتي كتير قوي من وقتي

وانا حد نساي

فمسيري هنساكِ وبراحتي

ياروح الروح إل عاشقها

من دون الأحباب

من غير ماطرودي ياعمري

خدي وراكِ الباب

وإن خدعوكِ وقالولك ..

دا ميت فيكِ

وقلبه يوماتي بيتقطع ..

وبيبكي عليكي

قوليلهم شاعر من يومه

بحروفه ينقش الفرحه ..

وبحروفه يلونها عذاب

ومعروف الشاعر طول عمره

إنه كداب

باي باي

عبدالحميد المرسى

عرض الرؤى

معدل وصول المنشور: ٨

كل التفاعلات:

٣Ahmad Hamada، وعبدالحميد المرسى وشخص آخر