/////////+++يالواليدة+++/////////
فينك ياجلسة الواليدة
فينك يارسالة لمحنة
ياللي خليتي تنهيدة
لعمر زرب عليك ماتسنا
ياموصلة كل واحد لمقامو
من ثديك وشربنا لحليب
وكبرنا ف الظل وسلامو
ياام لولاد ومربية جيال
وا كيف نساك يالحنينة
ياللي منورة الاسرة ولعيال
ف حضانك لميمة هنينا
احكيمة ومخيطة لجراح
ف مسيرتك هزيتي لكثير
صبارة ومبينة لفراح
عالمة بلي ف عماق البير
سايرتي الركب بصبر ايوب
ياك ربانة سفينة فزتي
ومقربة كل غريب ومحبوب
بهوال لحياة لالة سرتي
في كل مجال ظاهرة باينة
طالبة من العالي كل رجا
بالجد غادة موجودة كاينة
يامن وصلتنا لشط نجا
ربي يرحمك يامن كبرتنا
انتي والغالي ف جنة الخلد
ومحبتكم مازالة ف القلب داوية
يالواليدين ماتعرف بعد
ف حياتنا ومعانا راوية
بقلم صقر الحروف الزجال المحجوب بوسبولة
ليست هناك تعليقات:
إرسال تعليق