بمناسبة عيد تحرير سيناء 4/25
تحيه لكل جندى فى جيش مصر
★★★★★
اوبريت غنائي
(حكاية سينا)
كلمات الشاعر (ادهم العوضي)
ادهم عبده مجلى
★★★★★
الحلم مش مستحيل الحلم سهل الوصول
يا سينا جيل ورا جيل حاميكى روح وعقول
★*★*★*★
من الله محفوظه يا سينا
فى القلب عمرنا ما نسينا
لو توهنا مره وبعدنا نلاقيكى انتى تدلينا
★*★*★*★
يا سينا ابويا ضحى عشانك
وابنى راح يبنى مكانك
ويعيش في خيرك وينمى
مهو انتى بنتى ومصر امى
وحبايبى يبقوا خلانك
★*★*★*★
فى كل حرب وحارسانا
لو طمعوا فيكى اعدانا
نلاقيكى بتنادى علينا
وبنفدى فيكى بعنينا
واهو انتى بتلبى ندانا
★*★*★*★
لما اللى منا وقالوا احباب
بقوا لينا خنجر فى الاجناب
وقفتى برده يا سينا معانا
وقدرتى تاخدى التار فى عزانا
وقضينا سوا كده ع الإرهاب
★*★*★*★
يا سينا انتى الخير كله خيرك هييجى ونوصله
وفداكى والله شهده كتير وعهدنا مش هنحله
★*★*★*★
يا رمال دهب وجبالها نحاس
فى اى حرب تصدى رصاص
جواكى خير ما بيتقدر
وهنبنى فيكى وهنعمر
خيرك يكفى كل الناس
★*★*★*★
بعد الشهيد ما راح الجنه
نزل لارضك واتحنا
مهو انتى مهبط للاديان
ورب ذكرك فى القرآن
وانتى حته من الجنه
★*★*★*★
مكانك انتى يا سينا كبير
بعد الامان ويا التعمير
دى اغلى عندى من ولدى
والود ودى يا ناس بلدى
افرش دروبها ورود و حرير
★*★*★*★
دم الشهيد ياما رواها
كان راضى والله وحماها
وحلف ما يسكن سينا غريب
لو حتى جسمه كان هيغيب
لان روحه ساكانها
★*★*★*★
حكاية سينا (اوبريت غنائي)
الشاعر/ ادهم عبده مجلى
(ادهم العوضي)
ليست هناك تعليقات:
إرسال تعليق