////////+++يارفيق العمر+++////////
خليني نسافر معا لكلام
ونداعب سطورك بلقلام
مازالة داوية تخلق حلام
وانا للي مخليك بلى لجام
نقشك حاجات من واحة البال
سربة فهامة فيدين جيال
ونوصلك ياحرفي لجبال
ياللي خارج ف ربيع لفصول
والالهام يفرز سر القول
انت الهمس الصافي المقبول
وانا للي عارف معاه نجول
يارفيق العمر ملي تحضر
ياك نت للي تحكم وتصدر
وللي مايعرفك ما يعدر
ياحرفي وحدك كاتبهر
يارفيقي للي ما ينساني
قلب جليسك ديما هاني
وحضورك بالسر دواني
يامزين اسرار ديواني
انت جليسي مجبر الخاطر
فيك مغناطيس ديما حاضر
ومعايا ياحرفي صابر
ماتجرح حرفي لمشاعر
بقلم صقر الحروف الزجال المحجوب بوسبولة
ليست هناك تعليقات:
إرسال تعليق