( المسحراتي)كلمات/صبري حسين
(7)
مسحراتي
انا المسحراتي
رامي حمولي علي ربي
احب الخير لغيري
زي ما بحبه لنفسي
يا اولاد الحلال
اذا جاءكم ابن الحلال
وخبط علي الباب
جاي يطلب بنتكم في الحلال
عايزه يكون أسرة
خلي في قلوبكم رحمة
إياكم تطلبوا طلبات تنوء منها الجبال
اطلبوا كل حاجة بالمعقول
بلاش طلبات تطير العقول
كل حاجة بالأصول
سعادة البيوت عمرها ماكانت بالمال
السعادة في التوافق بين الطرفين
الحب اللي جمع القلببن
ليه نطلب حاجات ومحتاجات
تصرف فيها آلاف الجنيهات
ليه نبص لغيرنا
لبنت عمتها وبنت خالتها
وكمان البنت اللي في اخر شارعنا
نفضل نقارن باللي جابوه قارببنا وجيرانا
ليه نصرف شقانا
علي مظاهر فاضية
انت عارف وهي عارفة
مهما تعمل مش مشكور
الكل علي فرحك هيتكلم
ياليت نعقل الكلام
ونبطل الخوف من الملام
سيبك من كلام الناس
اطرد من راسك الوسواس الخناس
اعتبر اللي جاي لبنتك ابنك
اتعامل معاه بقلب
اياك تتعامل علي انك تاجر
وتخلي الجواز بيعة وشروة
الجواز يا احبابي مشاركة
لازم يبني علي التقوى
ايه المانع نشتري
اللي فعلا نستعمله
ومع الايام نشتري باقي الحاجات
عايزين نسهل الحلال
ونخليه سهل المنال
انت عطيه حتة منك
فلذة كبدك
يبقي اهم حاجة تختار اللي يحافظ عليها
فعلا يكون شرايها
يضحي بحياته علشان يسعدها
يالتقوي يعاملها
يحسن اليك وإليها
يا اهل العقل
حكموا العقل
إياكم تقيسوا الرجال بالمال
وكمان انت يا بنتي
خلي في قلبك رحمة
بلاش تحملي اهلك حاجات ملهاش ستين لأزمة
مش لازم من كل حاجة دستة
هاتي بالعقل والحكمة
بلاش تثقلي علي ابوكي
زي ما جهزك عايز يجهز اختك
عايز كمان يساعد اخوك
يا اهلي واصحابي
يا كل جيراني
صلوا علي الهادي
عليه افضل الصلاه والسلام
اللي قال إذا جاءكم من ترضون خلقه فزوجه
اسمعوا واعقلوا الكلام
لكم مني تحية وسلام
يا مسلمين يا موحدين
كل عام وانتم طيبين
رمضان كريم
صبري حسين
ليست هناك تعليقات:
إرسال تعليق