زجلية هزلية تحت عنوان:لاباس علي***

 زجلية هزلية تحت عنوان:

لاباس علي***

لاباس علي

حيث من عرق بنادم سَكَيت

كنت طويل فقير حتى عييت

دوزت التكرفيس والميزرية

سنين شحال سرقت ؤ نهبت

كذبت على هذا ؤ على الاخر نصبت

المهم لكَرمومة ولو بالحيلية

لي فرط يكرط ؤ هز حُط

سنطيحة ؤ لفهامة وسْرُط شرط

درت لاباس ؤ نسيت لخربة والدونية

لكن تبعت حكمة الا بغيتي تعلا

تاجر في البشر ؤ حيد الضمير ؤ تسلا

اليوم عنطزت ؤ مثلت الدور بفنية

بديت زعما ندافع على لمزلوط

ل من دمو وفرت الريال عاد محبوط

قالوا هذا واعر...

فعليوه شوية

دخلوني لقبة يا فلان

المرسديس نيو وكلشي بالمجان

مرة شاخر مْتَمًن ؤ مرة عيان

ؤ مرة بصراخي م تقول غ طرزان

عرفوني نصاب ؤ صفقو لي

ؤ نهار زطمت على لكرسي

دست ذاك الصوت الصادح المنسي

ؤ عاد التشلهيب ولكذوب في بلية

جمعت المال والسلطة

لم لم ؤ زيرت على بنادم الصمطة

دابا ملايري وليت ؤلاباس علي

ؤ نت يا ذاك المنهوك المقهور

مالك حاسدني فسير تدور

إيه كنت هزيل لبارح...

ؤ بحقك وليت عنتر بالشاشية

لي دوا يغبر او يرعف

بنادم غ شبع ؤ بغا ينتف

ما بغاونا نحياو في الخير...

ؤ يقضيو هما بالطعمية

وحيت عدت في الأرض جذام

جمعت كَاع الشرور ؤ شبعت حرام

درت لعمران وخا توسخت يدي

عاد طبعي نكار حقار

انا لي لاباس عليه يا حُضار

ؤ في كلشي ولات عندي الأسبقية

ب آلو كلشي نقضيه

ؤ ل نفنف نديه نربيه

او نصنع ليه مسطرة وقضية

انا طرزان

انا لي لاباس علي

لمناصب لعليا ل ولادي

باش يتساواو مع لفقير ما هو عادي

هذاك عندهم يكون ترًاس...

ؤ ينظف جرادي

ؤ ل كان فايق الهجرية السرية

لكرسي ولمنصب ولى عدنا وراثة

ؤ لحلم عاد محال كْلاتو تاتا

باك صاحبي ملتنا ولمحسوبية

انا مول السلطة والمال

تغنيت فابور بلا حمل أثقال

الصناديق خويناهم ...

ؤ بقى جيبك مثقوب انت ونتي

فتعب انت ؤ كدح

يجي واحد ناعس ؤ على ظهرك يترفح

ؤ تبقى حاصل في الميزيرية

انا مول لفلوس

دوني كلامو مسوس

شناقة حنا ولحرايمية

واش فهمتي دابا شكون نكون

انا ذاك لي عاش لتحت مغبون

عدت مول الريال...

ؤ صبحت لاباس عليً

*** الزجال والشاعر: احمد الكندودي ***المغرب ***

٦٦

١

١٤

أعجبني

تعليق

مشاركة