زجلية تحت عنوان: باك صاحبي***

 زجلية تحت عنوان:

باك صاحبي***

حرام يا لخو تريب ؤ تهدم

بجهلك ؤ نقصك عزة بلادي

حليفتي ما تفكر ، ما تخمم

خاوي غير مكَدم ، ؤ غادي

ما خفتي من الجاية ، ف تندم

وتحاسبك هي محكمةاعدادي

راكب عليه ملاطي ؤ مصمم

فاسد ؤكلشي ف مخك عادي

منين يابلادي طاح هاذ الردم

ؤ منين ، خرجوا هاذ الاعادي

واش لميزان مال عواج ؤ جهم

ؤ لكفة تصدات في ظلم غادي

متى تنور شمس الحق والهمم

ينور الزهر ، ؤ يحلى إنشادي

وإمتى تهز القوم الغيرة ؤ يتلم

ؤ بالمحبة والصفا تمد الأيادي

و إمتى تسالي لغة ذهن و الهم

باك صاحبي ، ؤ كرباج جلادي

الطيور هربت خلعها لغد لمظلم

عيات م تصيح ؤعيات م تنادي

النوارس كساها اليأس و الغم

سيلوا دمعاتها هاذوك فُسادي

سايبة لقتيها ، فزيد نتف ؤ غنم

غدا يفجر الصبح ؤ يطل شادي

فالرجوع لله ي ل حلف ماحشم

فيق راك ما زدتي غير ف سهادي

حرام يركب لموجة طماع ظالم

ب التغرير و ب تصفيق الأيادي

ؤ حرام يتباع الكرسي ل مجرم

او ينوب علي واحد شفار سادي

فأش هاذ الماركة ؤ هاذ الصمم

ؤ واش هاذ لجبروت والشر لبادي

ففوقاش يا بلادي لمضرور ينعم

تضوي نجومي وبدري وسعادي

باك صاحبي ولحق داسو قزم

تسود لعدالة ، ؤ تهز راية جدادي

فباركا من لي همشو الحق ؤلقلم

ردوا الجهل سلعة ، ؤ باعو ولادي

ؤباركا من التمييز ولعنصرية ولهم

باك صاحبي هدمت فراح حفادي

حرام يا صاح تميز تريب ؤتهدم

بجهلك ونقصك ،حيت فظ سادي

***الزجال والشاعر:احمد الكندودي ***المغرب***

٢٢

١

٢٩

أعجبني

تعليق

مشاركة