بائعة الليمون
* صباح الخير يا أمي
معاكي لمون
** معايا أكياس لمون طازة
* هاتيلي كيس كدة أشوفه
ماله قليل ومش مليان
هاتيلي بداله كيس فاضي
وروحي امليه
وقولي بس مالآخر
بكام تبعيه
** ببيعه يا ابني بتنشار
عشان خاطرك ونستفتح
بعشرة جنيه
* ماقولنا يا أمي مالآخر
خلاص ناوليني كيس تاني
وهدفعلك خمستاشر
** كده يا ابني ما جاب تمنه
عشان غالي
ومش وقته ولا زمنه
وبعد شيله وغسيله
وتعبيته وقعدتي بيه
فكل كيس يطلعلي
يدوب بجنيه
*هاتي اللتنين بستاشر
** ويرضيك إني اخسر فيه
* أنا عارف
عشان شيفاني
بالبدلة وعربية
وشكلي مالافندية
قولتي تضحكي عليا
لكن قصره
خدي العشرين
وليا اتنين جنيه باقيين
ولو قولتي مفيش فكة
ولما تعدي ما انت زبون
هقولك دي آخر مرة
وبالباقي هاتيلي لمون
*** أخيرا كل ده تأخير
* بجد الناس بقت صعبة
بقت تاكل فبعضيها
ولازم تيجي على نفسك
عشان ترتاح وترضيها
***سيبك منهم
بقولك ايه
تعالى اعزمني على حاجة
في أي كافيه
* هتشربي ايه
*** أنا هشرب كبتشينو
* وانا مشروبي عرفينه
في كل مرة موهيتو
لذيذ وبجد حبيته
*** حسابه كام
*موهيتو وكبتشينو
يدوب تمانين
*** دفعتله تيب
* أكيد طبعا
دا حتى عيب
دفعتله مية بالمشاريب
* حقيقي مش خسارة فيه
سمعتيه وهو بيقولي
سعادة البيه
ولما سبتله العشرين
شوفتي قالي كام مرسيه
* لكن هية متعرفشي
تقول مرسيه
تقول يا ابني ومتعرفشي
تقول زيه
سعادة البيه
فقوم أديله بزيادة
ونزل منها هية جنيه
* ضميري مش مريحني
ونفسي مش مطوعاني
بقولك إيه أنا راجع
أجيب منها لمون تاني
* مساء الخير يا أمي
معاكي لمون
** مساء الورد يا ولدي
معايا كيس لمون طازة
لأحلي زبون
* هاتيلي الكيس كدة أشوفه
لمون طازة وكيس مليان
وقاية لسليم مالبرد
وصحة وعافية للعيان
وكله بركة من إيدك
وفيتامين سي ههههه
قوليلي بس يا أمي
بكام تبعيه
** ببيعه يا ابني بتناشر
عشان خاطرك وآخر كيس
بعشرة جنيه
* خلاص يا أمي دي ١٠٠
هاتخدي ١٠ تمن الكيس
وكدة يبقا فيه ٩٠
هاتخديهم هدية من ابنك
وتدعيلي دعوتين حلوين
** آلهي يسترك يا ابني ويزيدك
ويجعل تقوته فقلبك
ويجعل خيره في ايدك
ويجعل بعد عمر طويل
لقاك بيه هوه يوم عيدك
كلمات / محمد أبوبكر
ليست هناك تعليقات:
إرسال تعليق