.... عديها ....
عديها وإياك تشيل همها
لخبط حزنها بحبة من فرحها
وإضحك لها مهما زاد مرها
وكأنك بالأمل بتغيظ فيها
عديها بنكتة وضحكة حلوه
إمشي وأنت ماشي غني غنوه
إحلم بخيالك بدنيا حلوه
وأنسي دنياك إللي أنت فيها
عديها بطبق فول وخيار مخلل
أصلك عمرك فيها ماراح تخلل
حبة سنين وف أرضها تتحلل
مفيش حد مخلد أبدا عليها
عديهابلمة صحاب وخفة دم
كلمة في ضحكة هتنسي الهم
فاكر يالا زمان أيوه فاكر ياعم
أيام المدرسة وتزويغنا فيها
عديها عشان هي كمان تعدي
وإوعاك تاخد معاها كتير وتدي
لو جريت بيك أعقل أنت وهدي
ولو عقلت سوق جنانك عليها
عديها دي دنيا واحنا فيها ماشيين
مشوارنا يادوب فيها حبة سنين
ما نعرف فاضل كتير وللا يومين
عيشها كده وأرضي بنصيبك فيها
..... أيمن بلال ....
ليست هناك تعليقات:
إرسال تعليق