كنت ماشي في ضل أبويا
أي شيء ما يهمنيش
كان ورايا ضل حامي
خلا ضهري ما ينحنيش
مهما كان كبير السن
عندي كان أقوى جيش
كنت ماشي على حسه
بكره ييجي أو مايجيش
مش لازم أفكر أبدا
ناس تفهمني ما تفهمنيش
كان ليا أكبر سند
وأنا اللي كنت براعيه
بس كان ليا وتد
كنت بتسند عليه
كان لما ينصح بكلمه
كنت بسمع جد ليه
ممكن ما أكونش فاهمها
بسمعها وأنصت إليه
كنت أعينها في الذاكره
بعدها أفكر فيه
هو اللي يتمنى لي الخير
من غيره أطمن ليه
مهما كنت عندي قوه
خبرة السنين في عنيه
كان يفهمني من نظره
هاأعيش عمرى أبكى عليه
كان ليا صديق وأخ
وكان أب أتحامى فيه
لو يوم يزعل مني
أقول سامحني أبوس إيديه
كنت أدخل جوا حضنه
وأهرب من الدنيا إليه
بيوحشني كل لحظه
ألف رحمه ونور عليه
(((أسامه جديانه)))
ليست هناك تعليقات:
إرسال تعليق