...لسة الحب ...

 ...لسة الحب ...

ولساها حكاية حب

ولساها جوا القلب

ولسه السهر وياها

قلب اشتاق لقلب

وكل إللي كان زمان

عايش فينا بقاله زمان

كأن الفراق ما كان

كأننا بداية حكاية حب

ضفاريك مهما الزمن عدي

فيونكة متطرزة بورده

وضحكة عالقلب فايتة

تقول إنت زمان الحب

وطريق م المدرسة للبيت

خطاويه تحلف إن انا حبيت

بنوته من عينيها رويت

ورد الربيع عشان يتحب

ولمسة إيد ورعشة يد

بأعدي بيها مليون سد

وشوقي لبوسه تطول الخد

كفايه عليا بوسة القلب

وورده بقرش صاغ بتفتح

هدية تقوللي إوعي تجرح

خليني في هواك افرح

خليني في حلم الحب

كبار رغم ان سننا صغير

منعرفش إن الزمن بيتغير

وسكر زماننا يوم هيمرر

ونبقي ذكري جوا القلب

ده حال الحياه ياحبيبتي

كبرت انا وإنتي كبرتي

إتغيرت انا وإنتي إتغيرتي

بس إللي في القلب جوا القلب

عينيكي هي نفس العين

فيها إللي كان بيننا سنين

فيها لسه الشوق وفيها حنين

وفيها كلمة لسة جوايا الحب

.... ايمن بلال ....

عرض الرؤى

معدل وصول المنشور: ٢

١١

تعليق واحد

أعجبني

تعليق

إرسال