( إن كنت مش ناوي الرجوع ) : بقلمي الشاعر جمال زكي عينر

 ( إن كنت مش ناوي الرجوع ) :

وقدرت تبعد عنَّي

وتسافر وتهجُر

وقدرت على نفسي انا

ع البعد أصبُر

عوِّدت نفسي

ع البعاد وعلى الضنَّا

وقلت يمكن يشتاقلي يوم

يمكن يفكَّر

طال البعاد والانتظار

واتمنى اسمع

خبر يجيني يقول لقلبي

إنك هترجع

كان ليه يا قاسي تفوتني

اتعذب في بعدك ؟

ده انا قلبي م البعد إنجرح

والعين بتدمَع

ارجع بقى

كفاياك شقى

كفاياك عذاب

ده انا قلبي لو داق اللُقا

بعد الغِياب

حيعود شباب

وتعود لي فرحة اتبددت

وحتلقى شمعة منورة

على كل باب

إن كنت ناوي ع الرجوع

إرجع أوام

ما تزيدش في عيوني الدموع

ويَّا الآلام

ده انت حبيبي وضي عيني

إنت الدوا

إنت الهنا

إنت الفَرَح والابتسام

وإن كنت مش ناوي الرجوع

او غصب عنك

إبعتلي حتَّى مع الطيور

نِسمَاية مِنَّك

إبعتلي صوتك اسمَعُه

واسمع صداه

ابعت جواب إطلبني فيه

تلقاني عندك

إبعت جواب إطلبني فيه

تلقاني عندك

بقلمي الشاعر جمال زكي عينر

عرض الرؤى

معدل وصول المنشور: ١٤

٢أشرف مفيد سلامه منصور وشخص آخر

تعليقان

أعجبني

تعليق