إهداء إلى الراحل

 إهداء إلى الراحل

عبدالرحمن الأبنودي

بقلمي : طه هيكل

الليل فارد جناحاته

بيحكي للسهر حكاويه

بيغني من تعبه لحد الفجر مايناديه

يطل من ورا الجدران نور بسيط

أمل باهت

من بدري عمال يلاغيه

يحكي للفجر قصته وينادي على الصبر فين يلاقيه

يسرح ف سقف الأوضة يعد الشقوق بين الحيطان باشت وبقت طين

تاريخ كفاحه غالي

مش للبيع ومحدش يقدر بيشتريه

عقله شارد من طول الوقفة

والفاس علمت ف كفه والشمس قادحة على جتته بتكويه

كوم العيال بيصرخ

ده جعان وده عطشان لو وقعت يابطل مين يسقيه

يولع ركية النار يتلسع ميت مرة وعمره ماقال أي ومحدش داري بيه

خلجاته من كتر الغسيل دابت وخيوطها بتألمه آهي ساترة جتته كفاية الزمن كاويه

والشمس ف حضن الجبل بايتة بنص عين والليل واعر مين يواسيه

غابت الشمس والصهد طالع من الأرض بيحرق ف سكته مين يلاقيه

صامد ف وش الزمن بيحارب لجل يعيش من كد جبينه يمكن بكرة يراضيه

كل العيون باصة على عياله مستكتراهم عليه شوفوا الحيطان اتصدعت والرجول من التعب اتشققت بتجيبه م الغيط وتوديه

عيونه بلون الدم

من كتر العرق بيسح من على جبينه

والضهر انحنى من التعب ياترى مين يقويه

طار م الفرح لما لقى وليده بالشهادة داخل عليه

باس كفوف رجليه

ساعتها بس التعب راح لحاله ومن فرحته الدمعة فرت من عنيه

طه هيكل

٢٠٢٢/٨/٢٠

عرض الرؤى

معدل وصول المنشور: ٣٣

٢فهدالصحراء الجرئ وشخص آخر

تعليقان

أعجبني

تعليق

إرسال