...عشق السكات ...
هي عاشت جوا قلبي
وهي كانت نور حياتي
ولما كان الليل يمسي
حبها كان حكايتي
وحبها كان نهايتي
هي بكرة لما ييجي
جايب فرحة سنيني
هي حلم ياما حلمته
مستني ف يوم يجيني
هي جواب من كلمتين
لإمتي تبعدنا السنين
وتقولي أصبر شوية
قولي أصبر للحنين
قولي خلي شوقك
ينسي اللقا حبتين
هي حكاية وإبتدت
والنهاية كانت م البداية
أصل اللقا كان صدفة
والكلام كان من سكات
لميت سنين العشق
وكل كلام الحكايات
وصرخة صمت قالت
حبي ليكي للممات
بصيتي بنظرة عتاب
ليه مقلتش بحبك
ليه سيبتك مشيتي
مع إني كنت جنبك
ليه ما ندهتش عليكي
وقلت إسمعيني عايزك
خوفي كان أقوي مني
خفت لتقولي لا
ساعتها هلقي نفسي
قلب ضاعت منه الحياه
وبين خوفي وشوقي
بقيتي حلم عشت معاه
وكل إللي كان جوايا
وقصادك راح مني وتاه
قلته ليكي ولعينيكي
قلتلك بحبك وقلتي آه
قلت نفسي تبقي جنبي
قربتي وقلتي جنبك
قلت نفسي تسمعي قلبي
قربتي منه وقلتي بحبك
خدتي إيدي بين إيديكي
وإبتسامة شفايفك ويا عينيكي
قربت منك بشوقي ليكي
صحيت لقيت الحلم تاه
بس فاضل ليا ضحكتك
وإشارة سلام من بعيد
وغمزة تقوللي إستني
يوم لقانا هيبقي عيد
وعدي عيد وكل عيد
ألقي لقاكي لسة بعيد
وكل يوم حكايتي حكايتك
حلم يستني عيني تنام
ونفس العتاب منه ليا
ليه سكت جواك الكلام
كنت قلتلها بحبك
كنت قولها والسلام
خفت من كلمة بحبك
عيشها ياللا في الأحلام
وقول عاشت جوا قلبي
وقول كانت نور حياتي
وخليك لليل لما يمسي
وخلي حلمك بيها للممات
.... أيمن بلال.....
هي
ليست هناك تعليقات:
إرسال تعليق