( عاشق الليل ) : بقلمي الشاعر جمال زكي عينر

 ( عاشق الليل ) :

إزاي هغني يا ليل ؟

وانا ليلي مش موجود

الشمس مش بتغيب

والليل ما راضي يعود

نفسي أقول مواويل

واكتب مكاتيبي

واسهر في ضي القمر

واتهنى بحبيبي

يا شمس روحي بقى

عايز سواد الليل

خليتي يومي شقى

بين الأسى والويل

صحيح يا شمس النهار

بتنوَّرِي الدنيا

لكن سواد الليل

في العشق حاجة تانية

بالليل ألاقي الحبيب

زي القمر في سماه

بيهل بعد المغيب

الله عليه الله

في الليل بيحلى السهر

وتحلى فيه الآه

مش آه ندامة وألم

ده آه وله معناه

ما تستغربوش يا احباب

عشان عشقت الليل

في الليل أنا قلبي طاب

رغم العذاب والويل

إمتى الليل والنهار

ييجوا ف مواعيدهم ؟

قلبي خلاص احتار

ما قدِرش على كيدهم

ياشمس ياخت القمر

ليه تعاندوا بعضيكوا ؟

ده انتوا سوا والقدر

تكمل حياتى بيكوا

على ضي نور القمر

أنا بكتب الأشعار

على أحلى حب وسهر

ليلي بيبقى نهار

وتفوت علينا الشمس

حزنانة على حالها

تسمع كلام الهمس

حرارتها بتزيد نار

تسمع كلام الهمس

حرارتها بتزيد نار

بقلمي الشاعر جمال زكي عينر

عرض الرؤى

معدل وصول المنشور: ٥٣

٣فهدالصحراء الجرئ وشخصان آخران

٥ تعليقات

أعجبني

تعليق