.... طيب انا ....
اصل الجمال محتاج عينين
تطل عليه وتقولله انت فين
غايب عن عينينا من سنين
كفاية عليا نظرة رضا منك
انا بستاني وعشق الورد غيه
فيها إيه كلمتين وحبة ملاغيه
حلوة وجميلة طليت عليها شويه
عملتي محكمة وبقيت متهم عندك
إهدي حبيبتي انا صعب يوم أتلم
عشق الجمال ماشي ف عروقي دم
ليه بقي تقلبيها محكمة وهم وغم
فوتي دي نظره ليه تزودي ظلمك
عارفاني تقي نقي ومليش ف الهلس
بلاش كل حبه تقوليلي كفاية بقي بس
سيبيني أبص ومش هتسمعيلي حس
هي نظرة وعيني ترجع تاني عندك
وحياتك انا نظرتي لأي حلوة بريئة
بس هي اللي ساعات بتبقي جريئة
تستغل طيبتي ياحبيبتي وتعمل حريقه
وفجأه تقول عاجبني وعايزه ابقي جنبك
وانا ساذج وسهل تضحك واحدة عليا
بضحكه او بكلمه او لمسه منها لإيديا
فجأه تاخدني معاها لهواها ف دنيا تانية
وفجأه تلاقيني بأقوللها انا قلبي حبك
عرفتي إن انا إزاي حبيبتي م المظاليم
بيستغلوا طيبتي وانا م الناس الطيبين
واحدة تاخدني شمال وتانية تاخدني يمين
بس إطمني ألف ألف وارجع هنا تاني لحضنك
...حبيبتي ...
ايمن بلال ....
ليست هناك تعليقات:
إرسال تعليق