قصيدة بالعامية ( تعالوا نوشوشه)

 قصيدة بالعامية ( تعالوا نوشوشه)

شجر الحرام.. تسقيه سخام

يطلع قوام... تلاقيه طرح

تعزف صجاته نهار وليل

وفروعه ترقص م الفرح

مات الضمير جوه الجذوع

والخسة طرحت في الفروع

ثمرة وضاعة معفنة

لا بتملا جوف وتسد جوع

وقفت عليه فردة حمام

قالت تريح جسمها

من يوم طويل

ما هي أصلها

طارت كتير

علشان تلقَّط رزقها

شمت في غصن الشجرة قيح

وحاجات تمغَّص بطنها

ريحة الحرام ع الطير تفوت

واللي جعل من قيحه قوت

عنده زكام ما شمَّها

هو كده... طبعه كده

لو شاف حرام هيقرمشه

ريحة الحلال بتطفشه

لو طير فصيح

حاطت عليه

هيقوله إيه؟

وانتوا كمان هتقولوا إيه

يلا تعالوا نوشوشه

وإن بردو ما سمعش الكلام

يلا تعالوا

ندشدشه ونفشفشه ونقرقشه

بقلمي حازم قطب

عرض الرؤى

معدل وصول المنشور: ٣٣

٣٣

٤ تعليقات

أعجبني

تعليق

إرسال