" شوارع الصُدفة "

 " شوارع الصُدفة "

مشكورة يا صُدفة لإنك

في شوارعك بتجمعينا

و بنقابل في شوارعك ناس

نسينا اساميهم ونسيوا اسامينا

ماتت في عنينا ملامحهم... كل اللي

فاضل منهم كام ذكرى عايشة فينا

احلى ما فيكي يا صُدفة انك

بتعرّفينا من جديد على بعضينا

وإنك مبتديش فُرصة للشياطين

يلبسوا الوشوش اللئيمة

اللي وهمونا بيها انهم بني

آدمين وبيها عاشوا فينا

والأحلى إنك صريحة معانا

ولا في مرة فكرتي تجاملينا

بـ ودن الصُدفة سمعت اللي مني

بيفتح باب الشر اللي ساكينه

وبعين الصُدفة شوفته

عامل من المحبة سكينة

وبيقطع بيها حبل الوداد

اللي بقلوبنا فاتلينه

آاااه يا صُدفة يا بنت الذينا

قد ايه انتي صعبة وجميلة

على قد ما بتخلقي صدمة

على قد ما بتصحينا وترحمينا

من غش وخداع وتمثيل

ناس بتمثل علينا وتلعب بينا

في لحظة بتكشفي لينا

حقايق سنين طويلة

حقايق ناس كنا فاكرينهم امان

وفي وقت الغرق اياديهم تنجينا

طلعوا هما الطوفان وانتي

يا صُدفة طلعتي السفينة.

#الشاعر_مصطفى_عبده

عرض الرؤى

معدل وصول المنشور: ٢٩

١١

تعليقان

أعجبني

تعليق

إرسال

تعليقان

كل التعليقات