.........فيها إنه..........

 .........فيها إنه..........

انا واحد اتهور عالفاضي

خسر المستقبل والماضي

وبحايل كل الايام

وبدادي ف زمني ومش راضي

.....

انا شارب غلبي وشبعان

واتهرست كلمة تعبان

والصرخه المكتومه اتهلكت

واتركنت طي النسيان

......

انا باخد من حزني وابيع

والفرح يقرب بيضيع

وايامي بتضحك على همي

وخريفي عامل نفسه ربيع

....

انا واحد عايش مقسوم

والدمع ف حزني جه مرسوم

والحزن يوماتي بييجي يفطر

والفرح مصمم ليصوم

....

انا كل حياتي فيها انه

وطفولتي مولوده مسنه

ولقيتها معايا شابت فجأه

وبتاكل من غير ولا سنه

.....

اوقات بتخدني الأحلام

لزمان محضرش وقدام

معرفش هيجي ف يوم اصلا

ولا ادي تخاريف على اوهام

......

اوقات بستنا اليوم يحضر

وبجهز نفسي وبتحضر

وبقول هفرشلو المستقبل

وهجبلو صباح ويكون أخضر

......

وبقول لو زمني ف يوم يقبل

وبلاش يعاندني ويستهبل

راح اعبي ف ايامي الفرحه

واعمل لحياتي حساب اتقل

.....محمد إبراهيم درويش........

عرض الرؤى

معدل وصول المنشور: ٢٧

١١

تعليق واحد

أعجبني

تعليق

إرسال