( كلب الشوارع )
رسالة إلى الكلاب الضالة :
صوتك عِلِي يا كلب
لما مشيت انا
ما انا كنت قاعد
ليه ما كانش ليك كلام
مهما تهبهب او تهوهو او تثور
عمر الأسد
ما يجيب على الكلب الملام
كُلْ مِ الزبالة في الشوارع والحواري
وَاللي قدام البيبان
كلب الشوارع
ما ينامشي غير جنب الحيطان
هَوهَو وعَضعَض
في اللي زيك مِ الكلاب
بس الأسود
إعمِل لها مليون حساب
الزجرة منها حترعِبك وتفرتِكك
وحتبقى عبرة لكل أهلَك م الكلاب
فاكر يا كلب
لما كنت بتعبي الزبالة في الشنط
وكنت تِتدارَى
وتِستخَبى من القطط
ولما جه بتاع الكلاب
أفَشك يا كلب
دلدِلت ديلك واتلبخت
ومسكت في لجام العبط
كفاياك يا كلب
جرب بقى الأكل النِضِيف
كفاياك بقى
اكل الزبالة ع الرصيف
كفاياك بقى
دى فروتك شابِت يا كلب
لو جِه عليك فصل الشِتا
تضمن منين
ييجي عليك يا كلب صيف
لو جِه عليك فصل الشتا
تضمن منين
ييجي عليك يا كلب صيف
جمال زكي عينر
ليست هناك تعليقات:
إرسال تعليق