((( موثق ومكتوب )))

 ((( موثق ومكتوب )))

العمر عدى وفات

والسنين سحلت صحتى

لملمت أوراق السفر

والرحيل عانق مهجتى

والموت في نن العين

نايم والقبله وجهتى

وكأنى اقبلت ع الاخره

وورا ضهرى دنيتى

*****************

اتلموا الحبايب جنبى

وعيالى ورفيقة رحلتى

تمسح فوق جبينى

والعرق مصبب جتتى

وتزعق يلا اتشاهد

والنفس هجر حتتى

أصرخ والرزق خلص

ومين يسمع صرختى

اصارع سكرات الموت

ياريتنى ما عشت دنيتى

اصارع سكرات الموت

وأشد لحظات حسرتى

لحظه بألف سنه

دا لو صحت حسبتى

*****************

واتفتح الكتاب ولمحت ٠٠٠

ذنوبى أول صفحتى

كله موثق ومكتوب

والخجل مدارى كسفتى

يا ريتنى كنت وكنت

يا ريتنى أرجع دنيتى

أعمل الصالح وأوفى

وأكفر عن غلطتى

*****************

وأم العيال اصحا

والرعشه مسكت جتتى

يلا الفطار جاهز

وكأنى مستنى خارجتى

مش مصدق نفسى

صحيح رجعت دنيتى

أحاسب نفسى بنفسى

وشيطانى ما يعرف سكتى

والقلب اتعلق بالله

واصلى ع الحبيب قدوتى

وعشمى ف رب كريم

يرحم ويغفر ذلتى

وعشمى ف رب كريم

يرحم ويغفر ذلتى

*****************

شعر/محمد علي فرغلى احمد

مصر اسيوط أبوتيج نزلة باقور

عرض الرؤى

معدل وصول المنشور: ٢٨

١١

تعليق واحد

أعجبني

تعليق

إرسال