يا إلي إنت فايتني وظالمني

 يا إلي إنت فايتني وظالمني

ومن صوتك حتى حارمني

قلبي إلي هواك أنا خاصمته

وعلى تعبي معاك بشدة لومته

كان لازم يضبط إحساسه

وينظم نبضه على أساسه

وماكانش لازم يكون بيك شغوف

وكان يختبرك وبعدين نشوف

إن كان ف حبك لينا جدية

ولا بتتسلى بينا بحنية

وإنك مش جد ف الموضوع

لا فستان ودبلة ولا حتى شموع

يا إلي إنت فايتني وظالمني

ومن صوتك حتى حارمني

قلبي إلي هواك أنا خاصمته

وعلى تعبي معاك بشدة لومته

كان لازم م الأول يتأكد

وماكنش عليا وعلى نفسه ينكد

ونعيش أنا وهو مجاريح

وإنت سايبنا ف وش الريح

وعايش حياتك ومنظم حالك

وإحنا ولا بنيجي على بالك

وهنا إحنا إلي بنفكر فيك

ودايما بنروح وبنسأل عليك

يا إلي إنت فايتني وظالمني

ومن صوتك حتى حارمني

قلبي إلي هواك أنا خاصمته

وعلى تعبي معاك بشدة لومته

كان لازم يرسى على مينا

ويعرف إنك بإخلاص رمينا

وإنك بتفكر بس ف نفسك

وبتبات وتصبح ناسي أمسك

إرحمنا شوية من آساك

تعبنا المشي على الأشواك

إن كنت من غيرنا قادر تعيش

كان ليه الوعد المليان تحابيش

يا إلي إنت فايتني وظالمني

ومن صوتك حتى حارمني

قلبي إلي هواك أنا خاصمته

وعلى تعبي معاك بشدة لومته

كان لازم يعرف إن دي نيتك

وإن اللعب بالقلوب غيتك

يا إلي إنت بجد مش معقول

قلبي الي هواك لسة بيك مشغول

وعايش على أمل إنك راجع

ومش عامل حساب لزيادة المواجع

قمت خاصمته عشان يعرف غلطته

ويردم ع الماضي ويطوي صفحته

شعر غنائى /حنان الجوجري

دمياط الجديدة

عرض الرؤى

معدل وصول المنشور: ٢٢

٢Mansour Benmansour وفهدالصحراء الجرئ

تعليقان

أعجبني

تعليق

إرسال