جزاء الطيبة

 جزاء الطيبة

احمد صبري

-

اْكيد الغلط فيا

والكل بقى حقه عليا

يمكن صوتي مش واضح

يمكن عقلي كان رايح

رحت متشملل وب أناطح

جدران قصور الأنانية

نسيت نفسي في دوامة

عومت من غير عوامة

لقيت على الطيبة غرامة

أدفعها بقلبي وعنيا

-

للاْسف مابعرفش اْختار

مش كل شيء مكشوف

طبع البشر غدار

وبينكروا المعروف

ساعات اْندم و اْقول

ياريتني إختارت نفسي

من كتر ما أنا مسؤول

تعبت وجعت حسي

-

في دنية المجانين

الكل بقى طماع

زاد الجشع والعين

محتاجة ألف صباع

الصبر زي الجبال

شيال كل البلاوي

دلع ولعب عيال

كدب مالى الحكاوي

-

مركب من غير شراع

شايلة كتير عليها

وحدي باْلم الاْوجاع

واْسحب النايم فيها

لفيت بوجعي حروفي

مابقتش عارف اْعد

ب أبني الحلم بكفوفي

واْلف كف يهد

-

لسان الحق ينطق

للي عايز يسمعه

ع إللي بيخطف ويسرق

إللي غيره بيجمعه

كل الورق مكتوب

متسجلة كل الحكاية

مهما اتحدف بالطوب

والشر يجري ورايا

-

اْكيد الغلط فيا

وحسن النية بقى عيبة

لكن مكتوب عليا

أدفع جزاء الطيبة

لو غاب ضمير إنسان

وبص بعينه بس

الصورة مش هتبان

لو

واضحة

زي

الشمس

٧حنان سيد سلام، Batool Elaatrby و٥ أشخاص آخرين

٣ تعليقات

٩٣ مشاركة

أعجبني

تعليق

مشاركة