بعت وقلبى قالى شاريك
يااللى مالكش فى قلبى شريك
ياما سهرت ليالى طويله
تبكى العين والقلب يناديك
ياما حاولت اوصل لديارك
انت بعدت مع انى جارك
راح وساعتها وقال عدولى
ومن وقتها واتغير حالك
كنت بتبعد عنى وتتغير
وياما كتير فضلت ادور
واسال عنك كل حبايبك
عمرى ساعتها ماكنت اتصور
انك تهجر قلبى وتبعد
وانا اتحايل وقلبك يعند
انت فاكرنى عليك راح ادور
لاء من بعدك قلبى هايسعد
انت نسيت وانا كمان هانسى
وانت قسيت قلبى راح يقسى
ويعمل حاجز مابينى وبينك
بعد ماكان عاملك له مرسى
قد ماقلبك طاوعك سافر
خليك طير غريب ومهاجر
وكمان دوق الغربه فى بعدى
عمرى ماهاجرى وراك ولااعافر
ياللى جرحك واجع قلبى
اصلى بدارى عليك وبخبى
ابعد وانسى وكمان اقسى
انت بعدت ومابقيت جنبى
جرحك أصله علم فيه
بعد ماكنت اغلى ماليه
قلبى نسيك وماعاد يفتكرك
من كتر ما شاف عذاب واسيه
اه يااول نبض فى قلبى
حبيتك وانا ايه كان ذنبى
شوفت الغدر فى عينك قلت
ابعد عنه ولااتعب قلبى
عمرى مااسامح ابدا غدرك
اصل واجعنى كتير قوى جرحك
بكى القلب وجرح العين
واتاثرت قوى بعمايلك
ادعى عليك ولاانا ادعيك
تشوف اللى أنا شوفته فى ليلك
تسهر سهرى وتحتار حياتى
وتبات تنعى وتقول مواويلك
راوية حسن
ليست هناك تعليقات:
إرسال تعليق