( يا دنيا ليه ؟ ) :
يا دنيا ليه العذاب ؟
والفكر والحيرة
غُلُبت فيكي عتاب
لكن ماليش خيرَة
لو عاوز امشي يمين
شمالي يِحوِد بي
أَمَّا الخُصُوم والعِدَا
مالهومش غيري سيرة
يا دنيا نِفسِي بقَى
تشيليني من راسِك
حطَّاني دايماَ ليه ؟
قصة في كُراسِك
ما تحِلِّي عنِّي بقى
وسيبيني مع نَفسي
ده الوحدة لو كت عذاب
ولا خلطِتي بناسِك
يا دنيا خِفِّي بقى
حِملِك عن اكتافي
الصحة راحت خلاص
ما بقيتش متعافي
حِملِك تعبني يا دنيا
والقوة على قدي
إمتى بقى تِرحمِي ؟
وتقولي كده كافي
خفي عليَّا يا قاسية
كفاياكي حِمل تقيل
افكرك لو ناسية
ياما شفت فيكي الويل
من يوم ماجيتك يا دنيا
وإنتي معانداني
حاصبر عليكي اوي
والصبر آخره جميل
حُطِّي عليَّا يا دنيا
وتقِلِّي حمُولِك
بقى عادي عندي خلاص
ماهيه دي اصولك
ياما شفت فيكي الضنا
والذل والقسوة
ما بقيتش فارقة خلاص
عرضك كما طولك
ما بقيتش فارقة خلاص
عرضك كما طولك
بقلمي الشاعر جمال زكي عينر
ليست هناك تعليقات:
إرسال تعليق