.....حبيبتك انا ....
بتتكلم عن السنين
طب قوللي هي فين
وبتحكي عن الحنين
والشوق ووجع الانين
......
هاتلي السنين إللي راحت مني أنا
إحسب دموعي اللي عاشت كام سنة
وطلتي للناس يمكن تجمعنا صدفة
واترمي ف حضنك واقولك حبيبتك هنا
عشرين سنة والسؤال ملوش جواب
فاتني ليه سابني ليه وليه عني غاب
كان عاتبني بس فضل يقول الاسباب
عشرين سنة والدنيا غايبة عني انا
كتبت جواب بس العنوان معرفوش
يمكن تحس بكلام كتبته ماشفتهوش
وجواب ورا جواب عن شئ متعرفوش
إزاي ليل المجروحين الساعه بتبقي سنه
رجع سنيني إللي كانت معاك وضحكتي
ووردة كنت تقطفها تبوسها وتقول خدي
وكل يوم نتلاقي فيه كأننا بالحب بنبتدي
وتقوللي حبيبتي حبيبتي إنتي اقولك أنا
ترجع إزاي والسنين شبابها جوايا شاب
عشقت الجراح لما زمانك سنين عني غاب
عايزني ألومك مات زمن اللوم والعتاب
كل إللي باقي منك صوره تفكرني بحبنا
إرجع وسيبني أعيشك فرحة في الذكريات
تعدي عليا لما المح مكان كان لينا فيه ميعاد
ترجعلي ليه وإزاي ياحبيب زمني إللي فات
خلي صورتك عندي لسة فيها حلاوة حبنا
صحيح سعيدة إني النهاردة صدفة شفتك
وبعد السنين عرفتني وانا بقلبي عرفتك
سلم عليا وطول شوية خلي إيديا تضمك
ولما تمشي هغمض وأهمس حبيبتك انا
................حبيبتك انا
....ايمن بلال ....
ليست هناك تعليقات:
إرسال تعليق