جحا في كل زمان ومكان بقلمي : د\ نجوى رسلان

 جحا في كل زمان ومكان

ما بين ضحكة ودمعة

ومدح وذم

وكلام يشيل ويُحط

ويعلّم في طريقنا

سطور وكلمة وخط

أويِردم فينا ردم

حكاية جحا وحماره

عايشة معانا ما انتهتش

فمتحولش ترضيهم

هتضحك في عز أحزانك عشان ما تضيقش اللي حواليك

هيقولوا عليك عديم الإحساس

يبقى ما تجيش على نفسك وما تحولش

هتظهر الحزن اللي جواك عشان يحسوا بيك

هيقولوا ما بيبطلش شكوى وتعبنا معاه

وإحنا فينا إللي مكفينا

هو في حد خالي

يبقى اللي جواك جواك

وما تقولش

هتمشي توزع طاقة إيجابية وإنت جواك متقطع ميت حتة

هيقولوا ماهي مش فارقة معاه وهموم الدنيا مش وخده حقها معاه

وعنده وعنده أكيد مش هيتوجع زينا

إضحك وما تزعلش

هتتصرف بذوق وشياكة

بطبيعتك هيقولوا بيتصنع

هتحاول تقرب لطبيعتهم

ممكن تخسر نفسك

وتتوجع

هتاخد جنب وتقول أعيش في سلام

هيقولوا طالع فيها على إيه؟

هيعمل فيها سفير الأحلام

* يبقى أحسن حاجة إيه

إنسى نظرة الناس ليك

لأن الناس نفسها مشاعرها بتتغير

وياما شفنا ناس بتشتكي من ناس مُر الشكوى

وفجأة صاروا حبايب

وناس ما كانوش بيفرقوا بعض

أصبحت بينهم مشاكل ملهاش عدد

وصارت بينهم حرب قباقيب وشباشب

*يبقى لا نقرب قوي

*ولا نبعد قوي

*ولا نتعشم قوي

عشان ما نتجرحش بالقوي

*إحنا مش ملايكة

*ومش شياطين

إحنا بشر فينا الخير بنسب متفاوتة والشر كمان

**ربنا يعينا على الشر اللي جوانا

وينور بصيرتنا ويزيد الخير في قلوبنا ونفوسنا

دعك من نظرة البشر

وانظر لرب البشر

وقول يارب

ساعدني أجاهد نفسي ساعدني أكون أقوى بالخير والحب والجمال

**يارب حبب لنفسي الطيب وجنبني ما سواه

يارب كن لي في ضعفي معيني

وهذبني في قوتي فلا أجور أو أتجبر سبحانك نصيري ووكيلي

**يارب لا تكشف عني غطاء سترك

ولا تجعلني أخشى سواك

ودعك من جحا وحماره

لا هيسيبوا جحا في حاله

ولا في يوم حد هيطبطب على حاله

غير إيده في شدته وفي ترحاله

ومين فينا عاشها جحا؟

تخاريف

#نجوايا

بقلمي :د/نجوى رسلان

٤٧٤٧

٣٤ تعليقًا

٤٨ مشاركة

أعجبني

تعليق

مشاركة