محتاج قدم
محتاج قدم ينقلني عندك
ينقلني من حالة الجديد
للقديم عندك
وتبقي عارفاني
كاني فستانك
كأني عقدك
كاني ليل في سريرك الوحداني
محتاج قدم ينقلني عندك
وتبقي عارفاني
انا بعرفك ولي الف حكايه في عيونك
في مره كان
في ايديك عيش وورد
عدي طفل
نقي العيش وساب الورد
عنيكي سألتني ليه
ساعتها مقدرتش ارد
حسيت بمسمار نار
مدقوق في طرف لساني
ومشينا من تاني
ولساني
محتاج قدم ينقلني عندك
وتبقي عارفاني من تاني
الف بيكي في الميادين
نسمع غني الفعلا نمشي متالمين
اوصلك للبيت بلا كلمه
نخوض في الضلمه
مخلوطه احزانك باحزاني
محتاج قدم
محتاج قدم ينقلني عندك
وتبقي عارفاني
نمشي سوي في المدينه
نلعب سوي
نضحك سوي
نرقص انا وانت
حياري منكسرين
تحت المطر
عرايا
حياري
عصافير بلا شجر
ندخل سيما
نخرج بلاكلمه
والدنيا ضلمه
نلف المدينه
بيوتها حزينه
غايبه ضحكتها القديمه
سرقوها ولاد اللئيمه
ولساني محتاج القدم
اللي ينقلني عندك
ينقلني من حالة الجديد
للقديم عندك
وتبقي عارفاني
بس اقول لمين
هو فيه حد النهارده
بيدي شيء للتاني
الشريف صلاح شعبان
ليست هناك تعليقات:
إرسال تعليق