يادار الحبايب
عمر غايب
الرحيل سكتى
غربة سنيين
مشوار طويل
الرجوع حلم
حياتى وأمنيتى
أنا الغريب يادار
راجع مليان مرار
مشتاق كتير
لأهلى وناسى ولمتى
يادارى أنا جيت
ع الباب ودقيت
على أهل دارى ناديت
بفرحة رجوعى بشوقى ولهفتى
ماحد رد عليا
دورت حواليآ
لقيتنى غريب يادارى
نزلت دموع عينيا
أنكسرت فرحتى
الباب أنا زقيت
ياأهل الله نآديت
أنا الغريب المسافر
يادارى أنا جيت
دورت مالآقيت
غير صورة ع الحيط
أبويا وأمى وأختى
وشمعة مطفيه
بصيت ع الجدارن
لقيت مكتوب كلام
جواب فيه السلام
العنوان كل واحد منهم
نام فى ارض غير التانية
حتى المكان إللى كان
بيجمعنا زمان
ابويا وامى واخواتى
لقيته عتمه وظلمه
لآنور ولآ تهويه
دار الحبايب اتفنى
ولا حد سال فيه
حتى الزمان اتنسى
مين يسأل على مين
رجعت قفلت الباب
ورميت السلام
على أرواح كانت
ليها زمان عاشت
فى أمان وحب وحنيه
هنا فى دار الحبايب
كلماتى
الشاعرالمهاجر
ابراهيم النشيلى
الاربعاء ٢٠٢١/٠٨/٢٤
ليست هناك تعليقات:
إرسال تعليق