ذكريات من الماضي ذكريات القمم ................ د صالح العطوان الحيالي

 ذكريات من الماضي " ذكريات القمم "

------ د.صالح العطوان الحيالي. العراق

للماضي الجميل طعم خاص ولهذا الطعم دائما نتوقع بذكراه العطرة لأننا نعيش حاضر مأساوي مر من الطبيعي العودة للماضي الجميل لكي ننسى الام الحاضر ... اليكم بعض الذكريات لان كل ذكرى منها هي قمة من القمم وساكتبها باللهجة العامية لتكون قريبة من الماضي وواقعه لربما تشاركوني الرأي فيها

١. قمة المشاكل

--‐ تتذكرون من جانت الشغلة اللي تهبطنه وتوكع كلوبنه هي انه اذا أحد منا كسر حاجة بالبيت؟ ونريد الزمن يرجع دقايق حتى منكون كسرناها؟ .

٢. قمة الخوف

---- تتذكرون من نخلي راسنه عالمخدة ونتذكر اكو درس ماكاتبينة وباجر مطلوب من عدنه؟ ويصير بينه مغص ومنعرف شنسوي ونكعد بس نريد نلحك نكتبه؟.

٣. قمة الترقب

---- تتذكرون من جنه نرجع للبيت متأخرين ونلكه أبونه راجع كبلنه؟ ونبقى حايرين خاف يسألنه ليش متأخرين ووين جنتوا؟ ونتمنه انه مينتبه وتعدي سلامات؟ .

٤. قمة الفرح

------ تتذكرون لما احنه بالصف وتجي طالبة أو طالب يكول للمعلمة: ست وين فلان ابن فلان؟ اهله جايين عليه، والمعلمة تكلك اخذ كتبك وروح للبيت؟ .

٥. قمة الإثارة

------ تتذكرون من نصير وكحين علساس ونروح لفرع أو منطقة مطابيلها كبل ونستكشفها؟ عبالك رايحين مدري وين؟ .

٦. قمة اللباقة

----- تتذكرون من يجون كرايبنه خطار وعدهم جهال بكدنه وأول سؤال تعارف يصير: وين واصلين بالقراءة؟ .

٧. قمة السعادة

-----، تتذكرون من يطلعون الخطار وكلنه بالباب نودعهم، ومن يرحون نطب فرحانين مدري ليش؟ .

٨. قمة العقل

------- تتذكرون من تجي مودة لعبة معينة وكل الجهال بكل المناطق يلعبوهه سوة بوقت واحد شلون ما ادري؟ .

٩. قمة الترويع

------- تتذكرون من نكعد ويه أحد اكبر من عدنه وطافية الكهرباء بالليل ويسولفلنه قصص خيالية رعب عن الطنطل وسوالفه؟ .

١٠. قمة الحماس

------- تتذكرون من يصير انتخابات فارس الصف واحنه مرشحين وكلبنه يدك ويه كل ورقة يقرون الأسم العليها ويشخطون عالسبورة؟ .

١١. كبرنه

----- كبرنه بسرعة كلش، كل ريحة من ذيج الايام، كل لحن او موسيقى، كل صورة، ترجعنه لذاك العمر بلحظة، يوم جانت هاي أكبر همومنا وأكبر افراحنا...

عرض الرؤى

معدل وصول المنشور: ٤٤

٣ابوفكري راجح، سماح الحنفي وشخص آخر

إجابة واحدة

أعجبني

الإجابة