موجة جديدة عبدالله رجب ابو عدنان

 موجة جديدة..

عبدالله رجب ابوعدنان

موجة جديدة م الوجع

البكا والألم والدمع

حذر وخوف وهلع

وهاجس ما بيفرق

ما بين فقير أو شبعان

ضيقة نفس

حتى إللي اختلس

واللي ف صندوق مقفول اتحبس

واللي اتربى ع الطغيان

واللي مكنز على قلبة

ووقت الضنا بيخاف ربة

وواحد ملا كرشة و عبو

ما حد لاقي حصن أمان

الموج تملي عاتي

زي قطيعة اخواتي

حتى اللمة مع بناتي

وانا قاعد وسطيهم بقى نوع م الهزيان

وميتم ف أول الشارع

وجنازة ف الجامع

وناس الوف و مجامع

والحزن طوفان

وأخ بيسلم أخ

وضرب نار طيخ طخ

ومعظمنا وقع ف الفخ

ورماد و سواد ودخان

وشاب طايح ف الكل

مع أقرب الناس بيقل

وكحة و عطس وسل

ومزعل حتى الجيران

وكفن ملضوم بكفن

زي كل حاجه ف بلدنا

صابها العجز والوهن

وزي البني آدم امتهن

وف كل مكان ريحة العفن

والموت يمكن راحة

لانة بصراحه

ما عادش فيه رحمه

وما عادش فيه إنسان

وف كل موجة ليها ضحايا

وملوك وزعما وهدايا

وابص شمال وابص يمين

وحراس كتير ب الملايين

واقفين مجنزرين

وموكب ورا موكب

من سنين بتغرق بينا المركب

لا الشبعان بيشبع

ولا الحزن بيرجع

حتى الظلم مسمع

ف كل مكان

موجة جديدة....

الشاعر عبدالله رجب ابوعدنان

٣٣

تعليق واحد

١١ مشاركة

أعجبني

تعليق

مشاركة