مبروووك ..... وائل سعيد

 مبروك ....... وائل سعيد

------------------

مبروك نجاحك يا محمد

ألفين مبروك

الدنيا فرحت لنجاحك

والناس حيوك

والأهل كملت فرحتهم

وجم هنوك

مش بس علامك يا محمد

دا طيابة وسلوك

أدبك وطاعتك للمولى

للفوز شدوك

لو فضلت اخلاقك تعلى

هتسر أبوك

ويزيد عشاقك يا محمد

وتعيش مبروك

لو لعبت وياك البليا

وركبت شروك

إياك يا محمد تتعالى

ع الواد مبروك

إياك تعيش يوم عالة

على ناس إدوك

يا جمال الإيد الشغالة

والخير مسبوك

لو حتى هتلم زبالة

اهجر مشكوك

وصلاتك للمولى تعالى

راحة وفكوك

رحمك وأهلك يا محمد

دول ناس ربوك

متقلش مشفتش يوم طيب

وزمان حرموك

واستر ياواد لا تعيب

على ناس ذلوك

دا سماحة طبعك هتشيب

لو ناس كرهوك

ويوم ما تيجى تتجوز

خد رأى أبوك

دور على الأصل يامحمد

لو كان فى تبوك

خد صاحبة دين مش أكتر

تسلم م الشوك

علم أولادك بعلامك

على حسن سلوك

ووعى تتوسع بأحلامك

وتعيش محبوك

خلى الأخرة قدامك

وناس سبقوك

مخدوش من الدنيا قبليك

غير المسكوك

مبروك نجاحك يا محمد

ألفين مبروك

.......وائل سعيد .......

عرض الرؤى

معدل وصول المنشور: ١٠

١على عوض