قصيدة 💐 الحرية { عامية مصرية بنكهة عربية } بقلمي ✍ أشرف محمد السيد __________________________

 قصيدة

الحرية

{ عامية مصرية بنكهة عربية }

بقلمي

أشرف محمد السيد

__________________________

☆ تعظيم سلام للحرية

معروفة للحُر تحية

دايماً بتهتف و تنادي

بالخير وبالسعد غنية

☆ بعتب عليكِ يا حرية

عاوزة دماء طاهرة زكية

حاضر و جاهز لحسابك

الرزق و العمر عطية

☆ الغالي يرخص للغالي

أرضي، شبابي وعيالي

صامد عشانك ومرابط

يا حلوة شاوري وتعالي

☆ العزة عنوان لكتابك

و النصر يفتح أبوابك

القلب عاشقك بيلبي

و الورد بيغني عتابك

☆قلمي، جهادي وسلاحي

شوقي ونضالي وكفاحي

رايدك و مستني قبولك

صاحي يا عُمري وأفراحي

☆ شالوا تابوتك خبوكي

قالوا دى ماتت وباعوكي

ضحكوا علينا بتغريدة

نحميك بروحنا ونفدوكي

☆ فى كل عيد للناس وقفة

فارس شجاع وجيوش واقفة

بعشق نسيمك و عبيرك

عند اللزوم كان ليك وقفة

☆ عُمري ما أعوفك ولا أسيبك

أنا أخوكي و حبيبك

قلبي بيهتف و ينادي

بالفوز و بالنصر هجيلك

☆ حرية قامت بالوحدة

جاهزة و واقفة ع الواحدة

تجمع شعوبي العربية

وتغور قلوب ناكرة وجاحدة

☆ حرية للقدس و غزة

لبلاد رباط فخر و عزة

فيها الدماء نهر بيجري

يروي الجفاف يعمل هزة

☆ حرية تعشق أشعارنا

ترفع و تهتف بشعارنا

تهدينا فرح و نصر كبير

شوفوا حلاوة ثوارنا

☆ حرية عارف أهدافها

شايف طريقها وأوصافها

زي الطيور بفرح بيها

ليه م المقرر تحذفها

☆حرية تسكن ف بلادي

بصرخ بعافر وبنادي

بمشي ف دروبها ومسالكها

وف حضنها عاشوا ولادي

--------------------------------------

بقلمي

أشرف محمد السيد

عرض الرؤى

معدل وصول المنشور: ١٦

كل التفاعلات:

٢Ashraf Mohamed Elsayed وشخص آخر