أمانه ياخياط عبدالحميد المرسى

 أمانه ياخياط

أمانه ياخياط ، فَصْلّٓلىِ جلّابيه

بياقه وزرارين ، ومبحبحه شويه

أحسن خلاص ، هموت من الخنقه

وحدانا ياخياط ، مفيش لينا ديه

أمانه ياخياط ، فصلّلى عبايه

مفتوحه من طوقها ، وكمامها فسحايه

قماشتها من ترجال ، ولونها راحة بال

تساع تعب روحي ، وهمومي ويايا

أمانه ياخياط ، غير بقى توبي

أخضر ومنعنع ، زهقت من الطوبي

حظي خفيف ريشه ، منقوش على خيشه

أجيب منين عيشه ، تقبلني بعيوبي

أمانه ياخياط ، ومش هقول تاني

فصل ياريت حظي ، وارميه ف عنواني

يكون سعيد الحال ، مبسوط ومتهني

مش حظ يألمني ، كفايه يا زماني

عبدالحميد المرسى

عرض الرؤى

معدل وصول المنشور: ٢٢

٢ارق ملاك وشخص آخر

٥ تعليقات

أعجبني

تعليق

إرسال